【JARvel-knowledge ・日本人的上下座概念（升降機篇）】
日本人嘅上下座概念，之前講完餐廳、的士、私家車、電車、連飛機都講埋，今次終於嚟到上下座最終回，升降機篇。相信大家同我諗嘅都一樣，就係日本人嘅禮儀真係去到好極致，連升降機都要分上下座。
事不宜遲，即刻同大家講解邊個位係上座，邊個角落係下座啦！不過入𨋢之前，首先要記住，如果你係做細嘅，當然要負責撳住部lift嘅開關，不過就千祈唔好一枝箭咁衝入去，要喺出面撳住或者用手擋住𨋢門，俾上司／前輩／客人先入，最後自己先行入去。而𨋢入面嘅上座，就係撳𨋢位嘅後面喇！因為可以方便同撳掣嘅人溝通要去邊層呀嘛！至於第2個位，就係另一角落嘅後排位，同之前座位提過嘅道理一樣，距離門口越遠就越係上座，所以第3個位，就會係第二個位嘅前面，即係唔係撳𨋢掣嗰邊嘅門口位 (雖然近門口，但係負責撳掣嘅係最下座）。如果之後再有第5個人入，而佢又高級過撳掣嘅人，但係又係其他3個人嘅後輩嘅話，咁佢就會企係門口前面嘅中間位喇！
出嘅時候，企門中間嘅要先出去讓位俾上座嘅人出𨋢，而下座就要一直撳住開門掣，等到上座嘅人出晒去，最後先到自己。
所以，真係搭程𨋢都係一門學問。如果你做細，唔小心企錯位，咁成程真係會尷尬到一個點㗎！雖然我唔知大家有冇機會實戰，但係當情況嚟到，你就會慶幸自己識多樣野㗎喇！
除咗搭𨋢之外，仲有扶手電梯都有上下座之分！好簡單，電梯嘅情況就係上電梯時，上座行先、下座行後，而落電梯時，就係下座行先、上座行後。呢個係基於安全而分，所以好易理解。
上下座概念系列暫時就告一段落，以後有機會再分享多啲俾大家知啦～
#JARvelogue
#恭喜大家修讀上下座101課程完成
#呢啲都係日本職場文化所以當小知識聽吓啦
#去旅行基本上用唔著嘅
#但係可以用嚟留意吓隔離啲日本人
#你就會知邊個係BigBoss
#鍾意睇嘅就Like同Share多啲啦
#動力嚟㗎
#唔係嘅就會發現突然無得睇
#因為我會開始懶
#日本冷知識
Search